કોરોના સંકટ: વિદેશોમાં ફસાયેલા ભારતીયોને સ્વદેશ લાવવા માટે 7મેથી તબક્કાવાર સેવા શરુ

ફ્લાઇટ્સ અને જહાજો દ્વારા ફસાયેલા ભારતીયોને સ્વદેશ લાવવામાં આવશે

એજન્સી, નવી દિલ્હી

વૈશ્વિક કોરોના મહામારી વચ્ચે ભારતીય સરકારે વિદેશોમાં ફસાયેલા ભારતીયોને સ્વદેશ લાવવાની પ્રક્રિયા શરુ કરવા તૈયારીમાં છે. સરકાર સાત મેથી તબક્કાવાર વિદેશમાં ફસાયેલા ભારતીય નાગરિકોને સ્વદેશ લાવશે. 

ગૃહ મંત્રાલય પ્રવક્તાએ ટ્વીટ કરી આ માહિતી આપી હતી. મંત્રાલય તરફથી જારી નોટિફિકેશન મુજબ નાગરિકોને સ્વદેશ લાવવા માટે ફ્લાઇટ્સ અને જહાજોની મદદ લેવામાં આવશે અને આ મુદ્દે જરુરી પ્રોટોકોલ તૈયાર કરી લેવામાં આવ્યા છે. વિદેશ મંત્રાલયના દૂતઆવાસ અને ઉચ્ચ આયોગ આ પ્રકારના ભારતીય નાગરિકોની યાદી તૈયાર કરી રહ્યા છે. વિદેશથી ભારત આવવા માટે જે-તે સેવાનો ખર્ચ નાગરિકે જાતે જ ભોગવવાનો રહેશે. 

સરકારી જાહેરાત મુજબ સાત મેથી વિદેશમાં ફસાયેલા નાગરિકોને ભારત લાવવાની તબક્કાવાર પ્રક્રિયા શરુ કરવામાં આવશે. યાત્રા શરુ કરતા પહેલા તમામ નાગરિકોની સ્ક્રિનિંગ કરવામાં આવશે અને જે લોકોમા કોરોનાના લક્ષણો જણાશે તેઓને યાત્રાની મંજૂરી નહીં મળે. તમામ નાગરિકોએ પ્રોટોકોલનુ કડક પાલન કરવાનું રહેશે. તેની સાથે-સાથે તમામ યાત્રીઓએ આરોગ્ય સેતૂ એપ પર રજિસ્ટ્રેશન કરકવાનું ફરજીયાત કરવામાં આવ્યુ છે અને ભારત આવતા તેમને 14 દિવસના કોરન્ટાઇનમાં ફરજીયાત રાખવામાં આવશે.