વુહાનની લેબમાંથી કોરોના પેદા થયો હોવાના અમેરિકા પાસે મહત્વના પૂરાવા છે: વિદેશ મંત્રી પોમ્પિઓ

ચીનમાંથી ઉદભવેલા કોરોના વાયરસે દુનિયાના મોટાભાગના દેશોમાં હાહાકાર મચાવ્યો છે, વુહાનમાં પ્રથમ ફેલાયો હતો

એજન્સી, વોશિંગટન

વૈશ્વિક મહામારી રુપે ફેલાઇ ચૂકેલા કોવિડ-19 મુદ્દે અમેરિકા અને ચીન વચ્ચે પરસ્પર આરોપોનો મારો ચાલી રહ્યો છે, એવામાં સૌથી પ્રભાવિત અમેરિકાના વિદેશ મંત્રી માઇક પોમ્પિઓએ દાવો કર્યો છે કે તેમની સરકાર પાસે આ બાબતના મહત્વના પૂરાવા છે કે કોરોના વાયરસનો ઉદભવ ચીનના વુહાનમાં સ્થિત એક લેબમાં કરવામાં આવ્યો હતો, જ્યાં ડિસેમ્બરમાં મહામારી સૌપ્રથમવાર વિશ્વ સમક્ષ આવી હતી. 

રવિવારે અમેરિકાના વિદેશ મંત્રીએ આ દાવો મીડિયા સમક્ષ કરતા ચીન પર કોરોના મહામારી ફેલાવાનો આરોપ લગાવ્યા હતા. પોમ્પિઓના કહેવા મુજબ કોરોના વાયરસ માનવ દ્વારા સર્જન કરાયેલો વાયરસ છે, આ સાથે વિશ્વના વિજ્ઞાનીઓનુ પણ આવુ જ અનુમાન છે કે કોરોના વાયરસ માનવ નિર્મિત છે. જોકે પોમ્પિઓએ કરેલા દાવા માટે કોઇ પૂરાવા રજૂ કર્યા ન હતા. પોમ્પિઓએ કહ્યુ કે, ચીનનો દુનિયાને સંક્રમિત કરવાનો જૂનો ઇતિહાસ છે. ચીનની પ્રયોગશાળાઓ સફાઇ અને સુરક્ષા મામલે બેદરકાર છે. 
બીજી તરફ ચીન પર અમેરિકા પર કોરોના વાયરસને ફેલાવવાના આરોપ લગાવી રહ્યુ છે.

ઉલ્લેખનીય છે કે, કોરોના મહામારીથી અમેરિકા સૌથી વધુ પ્રભાવિત થયુ છે, અહીં કુલ 11,58,000થી વધુ લોકો કોરોનાગ્રસ્ત છે જ્યારે 67 હજારથી વધુ લોકોના મોત નીપજ્યા છે.